Sa Aking Minamahal

Iniibig kita, na sa'ki'y nagturing

Na iyong sintang, pinuspos mo ng ningning

Iniibig kitang sa 'ki'y umiibig

Pagmamahal mo nga'y daig pa ang langit

Binigyan mo ng buhay, isip at diwa

Pinalaki't matiyaga mong inaruga

Binigyan ng paang may lakas tumayo

At kamay na kayang humubog ng paso

Kinukupkop mo ako't tinutulungang

Maging marangal at laging tangan-tangan

Pangakong pag-ibig na 'yong isinulat

Nasa isip ko't sa puso'y, walang tinag

Sa ating taimtim na pagmamahalan,

Malimot ka'y napakadalas nga naman

Ngunit ito'y 'sang bagay na sa 'yo'y hindi,

'Pagkat sumumpa ka na hindi babawi

O anong sarap ng iyong mga yakap

Bawat araw, ito ay aking pangarap

Na ang mas malaking bahagi ng buhay,

Sa piling mo magugol, 'wag nang mawalay

Ano itong pag-ibig na iyong taglay?

Sadyang 'di maubos ang tangan na saysay

Hindi lang libingan ang iyong sinisid,

Agwat ng lupa't langit, siya ring tinawid.